Her – langt nede i fjellet ved Nordfjorden i bygda Lefdal midt mellom Eid og Måløy – vil du i framtida finne Noregs «kollektive minne» og våre nasjonale «super-datamaskiner». Det er til å klype seg i armen av for oss som har følgd prosjektet sidan Sindre Kvalheim i 2010 fekk den ville og relativt ambisiøse ideen om potensialet i den nedlagde olivin-gruva som han var «oppflaska» i fordi faren var gruvesjef då Sindre vaks opp – men no skjer det. Akkurat slik Sindre våga å seie høgt i 2010. \n\nI går markerte to statsrådar oppstarten av Sigma2 si innflytting i Lefdal Mine Datacenter. Litt enkelt forklart betyr det at alle våre største universitet og forskingsinstitusjonar - herunder Universitetet i Oslo (UiO), Universitetet i Bergen, NTNU - Norges teknisk-naturvitenskapelige universitet og UiT Norges arktiske universitet no flyttar sine tunge forskingsdata om klima, språk, energi og helse, alle sine «tungregneoperasjonar» og framtidige superdatamaskinar hit – til ein nedlagd olivin-gruve i enorme gruvegangar med god tilgang til grøn straum, kjøling, trygge omgjevnader og nokre av verdas fremste teknologiselskap (m a IBM) som partnerar.\n\nOg dei er ikkje åleine. I «naborommet» til dei norske universiteta flyttar bil-giganten Mercedes-Benz inn sine anlegg for High Performance Computing (HPC). Her i fjellet i Nordfjord skal dei tungregne på framtidas bilar – i eitt av verdas grønaste og tryggaste datasenter.\n\nOg dette er berre starten. No rullar det vidare for alvor – i ei gruve som er nær sagt uendeleg stor, og har kapasitet med fiber, straum og kjøling til å bli eitt av Europas største og ikkje minst grønaste datasenter.\n\nOg ringverknadene lokalt er svære. Det er investert for mange hundre millionar kroner i anlegget allereie, og nesten all verdiskapinga knytt til anlegget er gjort regionalt og lokalt. Det siste året har om lag 100 personar hatt sin daglege arbeidsplass i Lefdal Mine – og det vil halde fram vidare. Etter opninga av Sigma2 i går sørga Sigma-gjengen saman med Måløy Vekst for å arrangere konferanse om potensialet for digitalisering i kystnæringane, og å bygge sterkare samarbeid mellom dei tyngste FoU-miljø i Noreg og lokalt og regionalt næringsliv på Nordvestlandet, med digitalisering som «motor».\n\nLefdal Mine-eventyret har definitivt ikkje kome siglande på ei fjøl. Det har vore knallhardt arbeid i 12 år av både Sindre Kvalheim, Mats Andersson, Jørn Skaane og mange andre. Mykje av arbeidet er «usynleg» - fordi det enten har skjedd digitalt eller djupt nede i fjellet. Men dei har – sann mine ord - bygd det viktigaste industri-eventyret i Nordfjord i vår generasjon. Og enno berre så vidt begynt. Eg er uendeleg stolt og glad over det som no skjer nede i fjellet i Lefdal – gratulerer med dagen!

2022-12-07 22:44:58

Orginalt innlegg på Facebook

Photos from Stortingsrepresentant Alfred Bjørlo - Venstre's post