Heime etter tre flotte dagar i Dublin, som utsending for Venstre på kongressen for liberale parti i Europa (ALDE – Alliance of Liberals and Democrats for Europe – med 70 politiske parti frå 44 land som medlemmer).\n\nDet er lærerikt og inspirerande å få møte folk som brenn for det same som deg i små og store land over heile Europa – frå Island til Ukraina. \n\nIkkje minst å få snakke med liberale politikarar frå Ungarn, der dei slåst med ryggen mot veggen mot Viktor Orban sine stadig meir omfattande forsøk på å undergrave demokratiet, og frå Litauen, som er næraste nabo til Russland og har svakare økonomi enn oss – men likevel langt tøffare enn oss i å iverksetje sanksjonar mot Russland og hjelpe Ukraina. Fordi – som dei seier: «It is a war for democracy. Then you have to do what it takes». Medan vi i steinrike Noreg “slepar beina etter oss” i å iverksetje sanskjonar som verkeleg svir, til dømes å stenge norske havner for russiske skip – eller å ta imot såra ukrainske soldatar. Det er tankevekkjande, for å seie det forsiktig.\n\nBetryggande å sjå og høyre at hovudsakene og «trøkket» for tida er det same for liberale parti over heile Europa: Kamp for klima, natur og grøn energiomstilling – kamp for fridom og demokratiske verdiar alle stader der dei er under press, meir samarbeid i Europa og å stå opp for minoritetane sine rettar - anten det handlar om seksuell legning, språk eller anna.\n\nOg så var det jo ein heilt strålande norsk gjeng å vere på tur med, med partileiar Guri i spissen. Festmiddagen på kongressen var på sjølvaste Guinness Storehouse, og etter kongressen rakk vi å sjå litt meir av trivelege Dublin med å leike Sherlock Holmes i «Escape Room Dublin», teste pub-livet med meir. No heime for ein mini-pinseferie i Nordfjord, får sommar-innspurten på Stortinget held fram på tysdag.

2022-06-05 21:37:25

Orginalt innlegg på Facebook

Photos from Stortingsrepresentant Alfred Bjørlo - Venstre's post