Vil du jobbe på @Statsmin_kontor? Ledig stilling i Innanriksavdelinga vår: https://t.co/EtVYUxlKHX

2018-01-26 10:39:33

Orginalt innlegg på Twitter

Seniorrådgjevar Innanriksavdelinga

Statsministerens kontor hjelper statsministeren i å leie og samordne arbeidet i regjeringa. Kontoret har ansvaret for å førebu, gjennomføre og følgje opp regjeringskonferansane og Statsrådet sine møte hos Kongen. Kontoret syter også for den formelle kontakten mellom regjeringa og Stortinget, og samordnar regjeringsmedlemene si deltaking i stortingsdebattar og spørjetimar. Kontoret har i dag ein politisk stab på ni personar og ein fast stab på omlag 80 personar, fordelte på Administrativ og konstitusjonell avdeling, Innanriksavdelinga, Internasjonal avdeling og Kommunikasjonsseksjonen. Vi har eit hyggeleg, til tider hektisk arbeidsmiljø, og er ei IA-verksemd. Innanriksavdelinga gjev råd til statsministeren og regjeringsråden i innanrikspolitiske saker. Avdelinga hjelper til med førebuing og gjennomføring av regjeringskonferansane, og gjev råd om saker som skal drøftast i regjeringa. Avdelinga har kontakt med departementa om saker som skal handsamast i regjeringskonferansane. Innanriksavdelinga samarbeider med Finansdepartementet om budsjettarbeidet og rådgjev statsministeren i budsjettprosessen. Medarbeidarane i avdelinga deltek i enkelte interdepartementale arbeidsgrupper og i prosessar som krev særskilt samordning mellom departementa. Avdelinga kvalitetssikrar også materiale til bruk ved møte, reiser, talar m.m., der statsministeren deltek. Avdelinga samarbeider tett med dei andre avdelingane ved kontoret. Avdelinga har seks medarbeidarar. Stillinga krev høgare utdanning og relevant erfaring. Det vil bli lagt vekt på erfaring frå departementsarbeid, god forståing for politiske prosessar og god skriftleg og munnleg framstillingsevne. Stillinga krev gode samarbeidsevner, stor grad av fleksibilitet og evne til å setje seg raskt inn i nye problemstillingar. Du må kunne handtere uventa situasjonar og tidspress. Den som vert tilsett må kunne sikkerheitsklarerast for strengt hemmeleg. Lønsspenn kr 623 900 - 1 100 800 og betalt overtid Nærare opplysningar ved ekspedisjonssjef Lars-Henrik Myrmel-Johansen, tlf. 22 24 40 38 / 991 54 203 eller avdelingsdirektør Inge Dokken, tlf. 22 24 40 22. Staten som arbeidsgjevar skal utnytte den fulle breidda i kompetansen til innbyggjarane. Den statlege arbeidsstyrken skal i størst mogleg grad spegle mangfaldet i samfunnet. Derfor blir alle kvalifiserte kandidatar med ulik utdanning, arbeids- og livserfaring oppmoda til å søkje jobb i staten. Statsministerens kontor er ei IA-verksemd. I dette ligg det bl.a. at vi vil syte for tilrettelegging på arbeidsplassen der det trengst.